Bernoulli, Johann I an Wolff, Christian (1732.04.04)
|
|
| Kurzinformationen zum Brief mehr ... | |
|---|---|
| Autor | Bernoulli, Johann I, 1667-1748 |
| Empfänger | Wolff, Christian, 1679-1754 |
| Ort | Basel |
| Datum | 1732.04.04 |
| Briefwechsel | Bernoulli, Johann I (1667-1748) |
| Signatur | Basel UB, Handschriften. SIGN: L Ia 671, Nr.36 |
| Fussnote | |
Viro amplissimo atque Celeberrimo
Christiano Wolfio
S. P. D.
Joh. Bernoulli
Acceperis, spero, postremas meas litteras[1], quas jam ante complures menses ad Te dedi, quasque commiseram nostro Burcardo, Tuo quondam Discipulo, suis quas ad Te parabat incluendas. Ecce nunc, qui hasce Tibi tradit est filius meus natu tertius,[2] aut potius post obitum primi secundus. Is nuper Doctor Juris creatus postquam fere ante triennium studii Juridici studium absolvisset, suamque publice defendisset Dissertationem inauguralem[3], tandem ingressus est iter ad Exteros, ut sibi comparaturus sit notitiam virorum doctorum et celebrium, quos inter primos Te, Vir amplissime salutare maximam sentiet honoris voluptatem, ubi praesertim dignaberis sermones cum illo miscere de rebus Philosophicis et Mathematicis, in quibus eum, ut spero, non leviter versatum deprehendes. Quandoquidem vero in animo constituit, iter suum bonis avibus Petropolim usque exporrigere, fratrem suum[4] visendi gratia, ac simul fortunam tentandi, si quid alicubi locorum, qua transibit, vel in ipsa quoque urbe Petropolitana Tuo nomine peragere possit, rogo id negotii ipsi committere no[n d]ubites, sibi utique summo ducet honori si tanto viro aliqua in re inservire queat. Et cum non ignorem Tibi amicitiam et familiaritatem intercedere variis in locis cum Patronis et viris magnae auctoritatis, praesertim cum illustri Blumentrostio aliisque qui gratia flagrant in aula Russica, quae nunc opportune Petropoli agit facies sane mihi rem gratissimam ac quovis officii genere demerendam si filium meum[5] litteris quibusdam commendatitiis efficacioribus stipare volueris, quae ipsi non tantum liberiorem accessum apud viros illustres procurabunt, sed id quoque forsan efficient, ut aliquam stationem sive in academia sive aliam nanciscatur, quo sine sumtibus meis, jam satis mihi hactenus onerosis, aliquandiu apud fratrem commorari possit, alioquin vereor fore ut hic quoque post septennale commorationis tempus ex statione sit discessurus tametsi is Illustri Blumentrostio[6] aliisque Aulae proceribus sit acceptissimus quod vel ex eo colligere potes, quod elapso quinquenni[i] termino cui academici se astrinxerant, ipsi salarium annuum ab octingentis ad mille et ducentos Rubelos auctum fuerit, concessa etiam libertate valedicendi si voluerit, postquam adhuc per binos annos Petropoli fuerit commoratus. Non dubito autem quin sit diutius mansurus, quod equidem vehementer cupio si junioris consortio (stabilita ipsi subsistendi facultate) frui daretur. Nolo Te Vir Ampl. pluribus detinere, nec mihi Patri convenit laudare filium praesentem[,] videbis ipse eum forsan plus in recessu habere quam externa fronte promittit. Vale et mihi meisque favere perge.
Dabam Basileae a. d. 4 Apr. 1732.
Fussnoten
- ↑ Johann Bernoulli an Christian Wolff von 1731.10.16.
- ↑ Johann II Bernoulli (1710-1790).
- ↑ Bernoulli, Johann II, Dissertatio inauguralis iuridica de compensationibus quam ... pro summis in utroque iure insignibus ac privilegiis doctoralibus rite capessendis publicae disquisitioni exponit Iohannes Bernoulli, Ioh. fil. Basil. ad d. 27. May. anno M DCCXXIX, Basileae (J. H. Decker) 1729.
- ↑ Daniel Bernoulli.
- ↑ Johann II Bernoulli.
- ↑ Laurentius Blumentrost.
Zurück zur gesamten Korrespondenz